F5 qu'èra a'm suplicar d'estancar de'u martirizar la tòca — que'm venjavi sus eth shens rason particulara, n'i avèva pas arren de personau : quite ua petita revenja que valèva ua grana. A despieit d'aquestas atacas tornadas, ne'i semblava pas har arren ; lo messatge que'm defenèva l'entrada, d'actualizacion en actualizacion :

Lo vòste compte qu'ei temporàriament indisponible ; un corrièr que v'ei estat enviat a la vòsta adreça electronica d'urgéncia. Volhatz seguir lo procediment de verificacion tà arrecaptar lo vòste compte.

N'avèvi pas la hami e ne'm vagava pas de'm floishar a aquesta camada : las questions secrètas, la demanda deu telefòn men, lo quau qu'avèvi balhat, dejà ? Qu'èra lo nom de gojata de la mea mair ? Lo men purmèr establiment escolar ? En si, tot aquò n'èra pas insurmontable, ua ahutada de memòria, pas mei — n'èra pas açò qui'm hasèva borir d'arrauja : expulsar atau, aquò, ne'u podèvi pas soffrir. Que m'avèvan copat la paraula, botar tà dehòra, sol : qu'èra imperdonable ; que i avèva aquiu, per jo, quauquarren d'inadmissible. Susmautat mes pas pèc, qu'obrivi la mea caisha de corrièr, volents o non, parat a har lo jòc.

6634 corrièrs, 54 corrièrs indesirables, 33 brolhons — la caisha qu'era bèth drin deishada — dens aquèste eshalagat de petitas envolòpas que's trobava lo passatge obligat, la casa seguretat, per la quau que devèvi muishar los papèrs, pr'amor la tela qu'èra suspecciosa de segur mes qu'èra tanben magnanima : un còp la mea identitat esclaridada e la mea innocéncia coneishuda que'm deisharé tornar prener la discuta dab la Sofia. Que començavi la mea exploracion, a léger cada títol ; lo que cercavi que devèva estar explicit — las intelligéncias artificiaus n'èran pas enqüèra poetessas — trobat ! Blocat enter dus rendetz-vos medicaus, n'èra pas tant luenh dens la coda. Benurat que'm vagara entà léger totau — shens nada suspresa , qu'èra shens nat estile — la mea analisi, de critic literari per IA qui avèvan la delèra de pròsa qu'èra confirmada...

Dr.Bòrdanava. Urgent.

Ua nòta que vienó de s'afficar: 6635... Un corrièr de mei, planvengut. La nautat suscitant tostemps en jo ua arregahada d'interès, qu'avèvi dejà tòrcut shens m'avisar de cap a l'urgéncia deu mètge.

Vueit... D'accòrd. Lo bon mètge qu'avèva devut har ua error en enviar aqueste corrièr shens escríver d'aute que lo títol — ua maishanta manipulacion, aquò, que podèva aparir a tot lo monde, rai ; qu'avèvi shens qu'aquò a har de tot baish : suprimir... Suprimir... La comanda ne reponèva pas — qu'èra bensai ua papa, un alentiment ; dab la massa que devèva sofrir la mea caisha n'èra pas estonant mes, hilh de puta, qu'èra esbirrajant. Que prenoi ua grana inspiracion ; qu'èri esmalit per aqueste ennau contratemps qu'avèvi jo medish crear : Aqueste ecran blanc que'm provocava.

– E't enlà ! Caralho ! que marteravi l'aurelha d'esquèrra de la mea soritz d'un indèx hòu.

Qu'acabèi per distribuir tecas suu monitor per brolh de quate, en negociar dab eth entà que m'escota e suprimeish aqueste corrièr inutile — plan segur aquò ne servèva pas entad arren, sonque peus nèrvis mens e qu'èra dejà pas mau : eth que demorava dessentit. N'i avèva pas sonque lo corrièr qui semblava voler participar a la convèrsa. Devath lo títol Urgent ua frasa que's compausada , d'era medisht, devath los mens ueilhs mescredents ; ua B puish ua O e ua N que's convidèn, l'ua après l'auta...

– Adishatz, Enric.